*Net die volle waarheid*

*Net die volle waarheid*

Paulus vertel dat dit nie aldag rooskleurig was om die Woord van God aan die mense te bring nie. Party het op hulle gespoeg en dinge gesê wat ’n mens nie hier kan herhaal nie. Hulle is met stokke geslaan en selfs in die tronk gegooi en tog laat dit hulle nie van hulle roeping afwyk nie: *3Ons het aanhou preek en vir die mense gesê om te glo. Ons het nie ons prediking skielik afgewater of verdraai om onsself te pas nie. Ons het nie geheime agendas nie.*

Kom ons wees nou maar eerlik met mekaar dat dit nie altyd maklik is om vandag hier in ons wêreld vir God se dinge op te staan nie. Die omstandighede is soveel anders en die meeste van ons se lewens is nie naastenby in gevaar as ons vir God se dinge opstaan nie. En tog sukkel ons.

Ek gaan stap vir stap deur die Bybel en probeer by elke teksvers stilstaan en hoor wat God daaroor sê. Daar is lekker tekste wat ’n mens moed gee en ’n hand op jou skouer sit as die lewe daar buite die lewe in jou wil dooddruk. Maar daar is ook tekste wat nie so lekker is nie. Dis dié wat ’n mens so bietjie oor die vingers tik en met ’n skerp lig in die donker kolletjies van ’n mens se lewe lig en dan is die prentjie nie so mooi nie. Hierdie tekste is nie so gewild in ons geweste nie.

In ons bediening sien ek hoe die bemoedigende tekste heen en weer vlieg soos vriende dit vir mekaar aanstuur. Ek kry hope terugvoer en ek is dankbaar dat ons al die mense kon bystaan in die swaar tye. Mense kry weer hoop.

Dieselfde gebeur egter nie met die tekste wat ons op ons verkeerde pad wys nie. Eintlik skram ons weg en lees vinnig daaroor. Dis erg wanneer ek sien hoe mense _unsubscribe_ van die nuusbrief as hulle aangepraat word vanuit die Woord.

As ons ernstig is met God se dinge, moet ons die volle verhaal vertel. Ons moenie net dit wat die mense wil hoor, vertel nie. Nee, ons moet God se hele boodskap verkondig. Ons moenie water bygooi om die erns van die boodskap af te water net om nie aanstoot te gee nie.

My vriend, my vriendin. Moenie ophou nie. Al lyk dit vir jou of daar geen opening  in die bos voor jou is nie, gaan voort. Loop binne die wil van God en doen dit waarmee Hy jou toevertrou het. Daar waar jy by jou werk is. By die huis. By jou vriende en selfs by die vreemdeling.

Hou net aan om te doen wat God wil hê jy moet doen! Moenie die goeters afwater net om by die mense in te pas nie. Moenie spoed verminder nie. Moenie dinge sê wat jy dink die ander wil hoor nie. Nee, noem die graaf ’n graaf.

En God sal die wind agter jou wees. God sal jou stuur en jou hand neem en vir seker sal die wêreld anders wees. Nee, nie omdat jy so oulik is nie, maar omdat jy toelaat dat God met Sy wonderlike boodskap deur jou werk. Dan sal die waarheid die heeltyd seëvier.

*Teks*

1 Tessalonisense 2:1-4

https://bible.com/50/1th.2:1-4.db

*Om oor na te dink*

Waar druk dit?

Waarmee moet jy deurdruk?

Wat van God?

*Gebed*

Vader, help my om U boodskap met ander te deel soos wat ek dit van U ontvang. U Woord is die Waarheid en niks anders as die Waarheid nie. Help my om dit nooit te verdraai om die guns van mense te probeer behou nie. Amen.

Shalom