Passie om te vertel, al hang ’n swaard

Passie om te vertel, al hang ’n swaard

Ek sien op Facebook ’n film van hoe al die dissipels dood is.

Petrus was onderstebo gekruisig.

Andrias en Filippus is ook gekruisig.

Tomas en Matteus is met ’n spies doodgesteek.

Lukas is gehang.

Markus is dood nadat hy deur perde deur die strate gesleep is.

Johannes is in olie gekook, maar het dit oorleef. Hy is die enigste dissipel wat in vrede gesterf het.

Jakobus is van die tempelmuur gegooi, maar het dit oorleef. Hy is egter met knuppels doodgeslaan.

Bartolomeus is gemartel en tot die dood gegesel.

Mattias is óf gestenig, gekruisig óf onthoof.

Paulus se kop is op ’n skinkbord vir Koning Nero se dogter gebring.

Om te sê dit was rof in daardie tye, is ligtelik gestel! Almal is gemartel. Almal behalwe Johannes het dit oorleef. Terwyl Andreas aan ’n kruis gehang het, het hy nog vir twee dae aangehou om die Evangelie te bring. Elkeen was bereid om alles, selfs hulle lewe, vir hulle roeping op te offer.

Hierdie passie kom keer op keer in Paulus se woorde na vore: 10In dieselfde asem bid ek nog die hele tyd baie ernstig dat God dit vir my moontlik sal maak om weer daar by julle uit te kom. Ek wil julle baie graag weer sien. Ek moet julle geloof nog sterker maak sodat daar niks in julle geestelike toerusting sal ontbreek nie.

Paulus weet dit is nie veilig daar buite nie. Hy sit mos in die tronk juis omdat hy nie wil stilbly nie, maar steeds smag hy daarna om weer by sy jong Christen-broers en -susters uit te kom. Hy móét na hulle toe gaan, want hy wil hulle nóg meer toerus sodat hulle nie deur die vyand van die pad gelok kan word nie. Niks sal hom keer nie. Nie eers die swaard wat die heeltyd langs die pad bo sy kop bly hang nie.

Watter groot voorbeeld is hy nie vir ons nie. Kom ons wees eerlik: Min van ons stap heeltemal in dié manne se skoene. Min van ons het ’n passie vir ander se geloof of selfs die feit dat hulle ’n gebrek aan geloof het. Dit skeel ons soms min hoe ’n ander man glo of nie glo nie…

Dit is vir ons so maklik om in ons karre te klim en te ry na iemand wat ons nodig het. Ag, ons hoef nie eens moeite te maak nie. Eintlik net daar waar ons elke dag met ander in aanraking kom, is daar die een geleentheid na die ander om iemand by die hand te neem en te help om hulle geloof te versterk.

Ek wonder wat sou gebeur het as die twaalf ouens te bang was om die Evangelie uit te dra. Wat sou gebeur het as hulle nie bereid was om vir hulle roeping te sterf nie? Sou God se Koninkryk vandag net so groot gewees het sodat ons ook daarin kon deel?

God, gee ons krag en moed om nie skaam te wees vir die Evangelie nie. Mag ons nageslag die vrugte van ons getuienis pluk.

Teks

1 Tessalonisense 3:6-11

Om oor na te dink

Hoe groot is jou passie?

Is jy bereid om alles op te gee?

Al kos dit jou lewe?

Gebed

Vader, gee vir ons die moed om mekaar te bemoedig en te help om geestelik sterk te word. Help ons om waardig te wees vir dit waartoe U ons geroep het. Amen.