*Alles bo die tafel*

*Alles bo die tafel*

*5Ons sal nooit dinge sê om by mense gewild te probeer wees nie. Julle weet dit al teen dié tyd. Ons probeer ook nie uit skelm maniere geld maak uit die evangelie nie. God is ons getuie. Hy ken ons harte.*

Hoekom is dit altyd so moeilik om dit waarin ek glo en dit waarvoor ek staan hard uit te roep, veral as daar van my vriende is wat nie in dieselfde goed glo nie? Hoekom is ek bang om die Here se naam te noem waar ek in die raadsale met ander besigheidsmanne vergader? Hoekom is ek bang om te wys waarvoor ek staan tussen my medewerkers of daar waar ek by my pêlle kuier?

Miskien is ons bang dat ander mense vir ons gaan lag of dat hulle ons gaan wegstoot en ons het hulle tog so nodig. Ons verander ons storie en los vir God net daar in die Bybel en dit net om aanvaar te word of om die werk te kry.

Mense sal vir jou respek hê as jy opstaan vir die regte goed. Mense sal dan weet uit watter stoffasie jy gemaak is en snaaks genoeg, hulle sal met jou wil assosieer. Hulle sal respek vir jou hê en weet dat hulle jou met enige iets kan vertrou.

Glo jy my nie? Probeer dit dan.

Ek het al telkemale in my lewe in situasies gekom waar ek huiwerig was om my mond oop te maak oor verkeerde goed wat gepraat of besluit was. As ek uiteindelik die moed bymekaar geskraap het om te sê dat die rigting wat die ouens nou inslaan nie vir my reg lyk nie, het dit meestal baie kritiek uitgelok en ’n moewiese stofwolk veroorsaak.

Tog, as die stofwolk gaan lê het, het baie van die groot indoenas na my gekom en dankie gesê dat ek bereid was om op te staan. Hulle het dieselfde gevoel, maar wou nie hulself eerste op die lyn plaas nie.

Vriende, daar is baie mense en organisasies wat dit nodig het dat ons as kinders van die lewende God opstaan. Daar is baie situasies waar God veranderinge wil bring. Daar is hordes plekke waar God verligting wil bring en dalk wil Hy jou gebruik om alles aan die gang te sit.

Moenie mense ontneem van God se goedheid, van God se groot hand wat net goedheid wil uitdeel deurdat jy konformeer met die mense en nie opstaan vir dit waarvoor jy staan nie. Die grootste ou boelie, die kwaaiste baas, die irriterendste kollega of vriend smag eintlik na God se genade en jy staan dalk in die pad deurdat jy alles afwater en vir die mense gee wat jy dink hulle wil hoor. Moenie dinge doen en sê om erkenning van mense te kry nie.

Wees altyd eerlik. Wees deursigtig. Doen alles bo die tafel, want ek glo oneerlikheid kom altyd aan die lig. Nie dat dit die rede is hoekom ons die reguit pad wil stap nie. Inteendeel! Ons probeer die regte dinge doen omdat God dit so van Sy kinders verwag.

Onder die tafel is die plek van die manne van die duisternis. En al lyk dit aanloklik aan die begin, waarborg ek jou baie moeilike tye wat voorlê. Onder die tafel lê baie lyke. Moenie eers probeer om in daardie rigting te beweeg nie. Indien jy jou daar bevind, moet jy jouself so gou as moontlik daar uitkry, want seer gaan jy kry.

Maak jou geld op 100% eerbare wyse. ’n Mens se kop vertel gou stories wat jy later begin glo. Voordat jy jouself kan keer, regverdig jy jou optrede wat so ’n klein bietjie weg is van wat die regtig ding is om te doen. Aan die begin pla dit jou nie eintlik nie, want jy glo die storie wat jy in jou kop opgemaak het. Pasop dat jy jouself nie pootjie nie. Dit is baie gevaarlik om op die terrein rond te beweeg!

God sien alles wat jy doen. As jy Hom as getuie moet inbring, sal jy en Hy tevrede wees met wat Hy oor jou doen en late getuig?

*Teks*

1 Tessalonisense 2:1-5

https://bible.com/50/1th.2:1-5.db

*Om oor na te dink*

Praat jy maklik oor God?

Kan mense deur jou iets van God in gesprekke hoor?

Wat moet jy ophou doen om ook die “100% eerlik” plakker te kry?

*Gebed*

Here, help my om in alles eerlik te wees. Help my om die regte pad te stap. Help my om ook ander mense rondom my te help om die regte pad te stap. Amen.

Shalom

Pieter Bezuidenhout