*Toevertrou in jou hande*

*Toevertrou in jou hande*

Vers 4 moet nog ’n keer aangeroer word: *4Nee, God self het ons uitgesoek vir hierdie wonderlike roeping. Hy het die evangelie in ons hande toevertrou. Ons sê daarom net wat Hy vir ons sê. Ons probeer nie om in mense se goeie boekies te wees nie. Ons doen net wat God van ons verwag. Hy weet wat die diepste motiewe van ons hart is.*

Jy verstaan seker nou teen die tyd dat God jou geroep het waar jy is. Dit is egter nie ’n toevallige roeping nie. Dit is nie ’n roeping waarmee jy onverskillig kan omgaan en dit net doen wanneer jy wil nie. Nee, hierdie roeping en opdrag wat God jou gegee het, is van kardinale belang vir die mense rondom jou.

Weet jy dat daar mense kan doodgaan sonder God as jy nie die verantwoordelikheid van jou roeping nakom nie? God het ’n groot stuk verantwoordelikheid in jou hande gesit en dit aan jou toevertrou.

Wat doen jy daarmee?

Baie van ons sukkel om die roeping en opdrag te verstaan en deel te maak van ons lewe. Ons vra gou: Wat het God aan my toevertrou? Waarvoor het God my geroep? Wat wil God hê moet ek vir Hom doen? Watter verskil kan ék nou in ander mense se lewens maak? Kan ek vir iemand anders van God vertel?

Ons almal vra sulke vrae en daarom moet jy weet jy is eintlik op die regte pad. As jy erns maak met die opdrag, sal God se Gees jou lei oor wat jy moet doen met die verantwoordelikhede wat Hy aan jou toevertrou het.

Ja, ek weet die meeste van ons doen nie so goed nie. Die meeste van ons weet nie eers lekker wat die verantwoordelikhede is wat God aan ons toevertrou het nie. Dit beteken nie dat ons nou die ek-voel-soos-’n-wurm-bordjie om ons nekke moet hang nie. Nee, dit is dalk ’n wakkermaak oproep. ’n Begin om ons net aan die gang te kry om dit waarin ons goed is, m.a.w. die gawes wat God ons gegee het, aan die gang te kry.

Moet tog nie so bang wees nie. Moenie verskonings maak soos “ek loop nie met my Christenskap op my mou rond nie” of ”ek kan nie ’n ander ou voor die bors gryp en hom vra hoe staan sy sake met God nie.” Dis heel waarskynlik nie wat God van jou verwag nie.

Doen net die regte dinge. Gebruik jou gawes. Maak ’n verskil in ander mense se lewens. Hoe? Gaan raak stil en hoor wat God wil hê jy moet doen. Dit sal nie lank wees nie, dan sal daar gedagtes in jou kop kom. Glo my, God sal met sy Gees in jou werk.

En miskien nog net hierdie waarskuwing: Moenie die goed probeer afwater om so in ander se goeie boekies te kom nie. Ja, dalk is jy bang die mense stoot jou weg. Dalk is jy bang die mense gaan vir jou lag. Dalk gaan dit so wees – daar is geen waarborge nie.

Daar is een belangrike ding wat jy egter moet onthou: Die mense het jou verskriklik nodig. Dalk sal hulle saam met die ander lag, maar diep binne weet hulle dat jy reg is. Eintlik wil hulle na jou toe kom, maar is dalk te bang. Kan ek jou mooi vra? Doen dit wat God in jou hande toevertrou het - voluit!

*Teks*

1 Tessalonisense 2:1-5

https://bible.com/50/1th.2:1-5.db

*Om oor na te dink*

Wat het God aan jou toevertrou?

Hoe kan jy dit gebruik om ’n verskil in ander se lewens te maak?

Wanneer kan jy hiermee begin?

*Gebed*

Vader, dankie dat U my genoeg vertrou om met ander mense oor die evangelie te praat. Ek weet ek kan dit nie uit my eie doen nie, maar dankie dat U Heilige Gees my sal bystaan en waarde en krag toevoeg tot enige iets wat ek doen. Amen.

Shalom

Pieter