DIE KOSTE VAN WARE DISSIPELSKAP!

DIE KOSTE VAN WARE DISSIPELSKAP!

Goeiemore liewe Jesus vriende, ek lees vanuit Jesaja 20:1-6. "In dié tyd het die HERE deur die diens van Jesaja, die seun van Amos, gespreek en gesê: Gaan gord die haarmantel van jou heupe af los, en trek jou skoene van jou voete af. Hy het toe so gedoen en naak en kaalvoet geloop." Jesaja 20:2 

Wanneer Jesus Christus my roep om 'n dissipel van Hom te wees, staan ek voor 'n groot uitdaging. Ek moet myself verloën en met Jesus Christus se lyding, verwerping en dood aan die kruis identifiseer. Die probleem is egter dat die mens in sy trotse waansin dikwels God se wysheid as dwaasheid beskou. 

Baie van die profete van ouds se optrede kom vir die mens, en soms ook die kerk, as dwaas voor: 

- Jesaja loop vir drie jaar lank naak en kaalvoet rond. 

- Jeremia moes ‘n swaar houtjuk om sy nek dra. 

- Eségiël moes in die openbaar garsbrode op 'n vuur van menslike ontlasting gaarmaak. 

- Daniel is in 'n leeukuil gegooi. 

- Hoséa moes met 'n hoervrou trou. 

Hierdie handelinge wys dat hulle volkome toegewy was aan wat God wil hê, nie om die wêreld te behaag nie, en onverskrokke God se boodskap aan die wêreld oorgedra het. 

Christene word ook dikwels as dwaas beskou omdat dit die ideaal van die wêreld is om in beheer te moet wees. Die Christelike geloof beteken ook dat ek my beheer afstaan en totaal van die Here afhanklik word. Ek moet my kruis opneem - dit is die afsterwe van my eie trots en verwaandheid en die drang om op slegs my wil aangewese te wees. 

Om lyding te aanvaar - jou kruis op te neem - is nie vir die wêreld normaal nie, om die waarheid te sê, ons doen alles in ons vermoë om lyding te vermy of ten minste vinnig te verlig. Enigeen wat vrywilliglik pyn kies, word gesien as dwaas, of dalk verdink as geestelik versteurd. Die evangelies is egter baie duidelik dat dissipelskap met koste gepaard gaan. Wanneer Jesus Christus my roep duld Hy geen mededingers nie, ek kan nie aan die tafel van die Here aansit, sowel as aan die tafel van die duiwel nie. Jy is vir God, of teen God - daar is geen gemaklike middeweg nie. 

Die oomblik wanneer jy 'n dissipel van Jesus Christus word staan jy lynreg teen die bestaande wêreldse norms en gebruike. Dit is egter nie altyd so maklik nie, want almal, ook die kerke, wil graag wys hoe belangrik hulle is deur hulle stempel af te druk op mense met al hulle nuttelose gebruike en rituele. 

Die manier waarop 'n dissipel op swaarkry reageer is ook anders as by ander minder gelowige mense. Die normale reaksie is om so gou as moontlik van die swaarkry ontslae te raak. Die Christen, daarenteen, besef dat hy God se wil uitleef en net op God vertrou. Dit sluit dinge in wat die wêreld as dwaas beskou - jy moet jou vyande liefhê en jy moet diegene wat jou vervloek seën. Hierdie is 'n siening wat die wêreld totaal en al verwerp, want dit haal die kollig van hulle groot egos af. Die wêreld sal eerder in woede tot geweld oorgaan. 

Volgelinge van Jesus Christus word dikwels ook baie name genoem - meeste van hulle afbrekend en spottend - en hulle word vertrap in die samelewing. Maar ons identiteit word nie bepaal deur die name wat die mense ons noem of dit wat hulle ons aandoen nie, maar deur wie ons is in Christus Jesus. 

Ek sluit af: Is jy gereed om jou kruis op te neem en Jesus Christus onvoorwaardelik te volg, of is jy te gesteld op wat jou vriende en mede werkers van jou gaan dink en van jou gaan sê; en is jy te gebonde aan al jou nuttelose aardse skatte? Jy kan nie God en die wêreld liefhê nie, jy kan nie God en Mammon dien nie. Is jy reg om op te staan vir Jesus en om Sy woord onverskrokke te verkondig, tydig en ontydig? Kies vandag nog waar jy staan teenoor Jesus, maar kies reg! Is jy vandag bereid om ALLES OP TE GEE VIR JESUS?