Plaas God eerste
Matteus 6:33
Nee, dit moet vir julle die belangrikste wees dat God julle Koning is. Julle moet gehoorsaam wees aan Hom en doen wat Hy wil hê. Dan sal Hy al hierdie ander dinge ook vir julle gee.
So ons verstaan nou dat ʼn koning beheer het oor ʼn groot gebied. God het beheer oor soveel meer as ʼn normale koning. God gee so baie vir ons om en somtyds mis ons net hoe baie goed God eintlik in Sy hande het. As kinders het ons ook geleer dat ons ouers baie keer reg is wanneer hulle ons waarsku – tog sukkel meeste van ons vandag nog om hulle te gehoorsaam.
Jesus vertel vir die mense wat na Hom luister dat hulle na God moet luister en Hom gehoorsaam. God se reëls is nie daar om ons pret te bederf nie, maar eerder om ons die beste te gee. Ons hardloop baie keer agter dinge aan wat nie vir God mooi is nie en sondig deur weg te draai van God.
Ons kan ook hieruit leer. Hoe meer ons begin besef dat God vir ons goeie dinge wil gee, hoe meer sal ons besef dat dit regtig die moeite werd is om God te soek voordat ons ander dinge soek. As ons God eerste soek, kom die dinge wat God vir ons wil gee natuurlik.
Plaas God eerste.
Gebed: Here, ek weet dat U soveel meer vir my omgee as wat ek regtig kan verstaan. Help my asseblief om U eerste te sit en nie altyd eers te hardloop na die dinge wat ek voel ek nodig het nie – ek weet U sal daardie dinge voorsien… Amen.
Uitdaging: Soms, deur gehoorsaam te wees aan God se opdrag om mense lief te hê, kan ons ook deel aan God se plan hê om aan ander mense te voorsien. Kyk in jou kas of daar enige klere is wat jy nie meer dra nie. Kan iemand anders dit gebruik? Daar is baie plekke wat ou klere inneem en versprei na die mense wat dit die nodigste het.
Geen opmerkings nie:
Plaas 'n opmerking