Kom saam met my

Kom saam met my

Kom saam met my! So lui Jesus se woorde aan Sy eerste dissipels in Matteus 4:18-20. Kom saam met my. Hierdie woorde van Jesus wat ook vertaal kan word met: “Volg my!” het in verskillende kontekste verskillende betekenisse. Kom saam met my kan dalk die meneer of juffrou wees wat jou na die hoof se kantoor toe vat. Dit kan iemand wees wat jou uitnooi na die partytjie van jou lewe. Dit kan maar net iemand wees wat jou saamnooi na die volgende werksafspraak. Hoe ook al, dit is beslissende en lewensveranderde woorde komende uit die mond en die hart van die Here Jesus, as Hy sê” “Kom saam met My”.

Kom saam met my, versinnebeeld die oproep wat vanuit die Jaartema op ons almanak na elkeen van ons toe kom.  Jaar van dissipelskap. Dit impliseer ‘n persoonlike geloofsverhouding met ‘n Lewende Here. Dis ‘n oproep tot dissipelskap. Die enkele woord wat die meeste in die Nuwe Testament gebruik word om Jesus se volgelinge mee te beskryf is dissipelskap. Jesus se opdrag in Matteus 28:19 is dat ons na al die nasies toe moet gaan en die mense Sy dissipels moet maak. Sy opdrag is nie maar net dat ons Hom sal leer ken dat ons kan hemel toe gaan nie. Natuurlik is Hy die weg en die Waarheid en die lewe na die Vader toe. Maar hier en nou, op aarde, in Margate, in Suid Afrika, word ons opgeroep om van mense dissipels te maak wat van ander dissipels kan maak.

“Kom saam met my,” is dus Jesus se uitnodiging om saam met Hom, by Hom te leer wat dit beteken om Sy volgelinge te wees. Hy roep Sy dissipels om te doen wat Hy doen, in Sy krag en Sy naam. Hy roep hulle om dit weer vir ander te gaan leer. Een van ons emeriti se uitgangspunte in hierdie gemeente is dat daar ander sal wees wat sy werk sal kan doen as hy weg is. Dit wou Jesus doen. Ons is ‘n ouer wordende gemeente. Is daar genoeg mense wat by jou gesien het hoe om in Jesus se voetspore te volg, soos jy gedoen het? Wat van jou kinders en kleinkinders, is jy vir hulle ʼn rolmodel van hoe omy die Groot Leermeester Jesus Christus te volg?

Met Jesus se oproep: “Kom saam met My, moes Petrus en Johannes hul visserskuite los en agter Jesus aangaan. Wat het jy agtergelaat om Jesus te volg? Loop jy dalk net vir die opwinding saam? Is jy deel van Jesus se bewonderaarsklub of Sy A span? Is 2016 net nog ʼn jaar van kerk toe kom om te ontvang, of is jy doelbewus ingestel om Jesus in die jaar opnuut te volg, opnuut elke dag die pad in gehoorsaamheid saam met Hom te stap?

Lees ʼn slag die hele evangelie van Matteus deur en jy sal agterkom dat Jesus lief is vir die “underdog”. Hy reik uit en eet selfs saam met melaatses, die onreines van Sy dag. (Matteus 26:6). Wie is die “onreines” na wie Hy jou stuur? Wie nooi ons vir ete, net die wat ons kan terugnooi, of dalk hulle wat niemand wil nooi nie, dalk die MIV positiewes? Jesus reik uit na kindertjies, die mense wat nie in tel was nie. Wie ken jy wat uitgestoot is deur die gemeenskap en nie meer in tel is nie? Beleef hulle Jesus se liefde in jou?

Om ʼn dissipel van Jesus te wees beteken om daagliks in lewensgemeenskap met Jesus te leef. ʼn Mens kan maklik volgens wette leef, leer Adrio König êrens. Elke dag werk elke wet presies dieselfde. ʼn Lewenshouding en lewensbeginsel geld egter vir spesifieke situasies. In die een situasie het Jesus die ander wang gedraai, maar in die ander het Hy die tafels van die geldwisselaars omgegooi. In een situasie het Hy vir Sy vyande gebid. In ʼn ander situasie het Hy hulle skerp aangeval, veral die godsdienstiges wat nie liefde nie, maar koud en klinies mense op ʼn weegskaal van een tot tien beoordeel het. Dis die dat Paulus elders sê dat ons moet bid om die dinge te onderskei waarop dit regtig aankom. (Filippense 1:1-10)

Om ʼn navolger/dissipel van Jesus te wees vra om daagliks nuwe besluite te neem onder Sy leiding in die lig van nuwe situasies. Dit beteken om in alles voortdurend oop te wees vir en te soek na Sy wil. Dit beteken dat ons naby Hom moet leef, want as ons Christene wil wees, moet ons dan nie soos Jesus wees en soos Jesus doen nie? Ons sal nie net by Sy wederkoms aan Hom gelyk wees nie, ons moet nou al rein soos Hy leef (! Johannes 3:2-3). Dieselfde gesindheid wat in Hom was moet ook in ons wees, wat beteken om ander hoër te ag as onsself (Filippense 2:3-5). Ons moet leef dat ander in ons kan sien hoe Jesus lyk (Galasiërs 4:19). Onthou net die gaan nie om in eie krag te leef nie, maar om saam met Paulus te sê dat ons tot alles in staat is deur Christus wat ons die krag gee (Filippense 4:13).

Sal ons as ouers aan die einde van 2016 kan sê dat ons die Jesus lewe by ons kinders en kleinkinders ingeskerp het, dat hulle by ons geleer het hoe om Jesus te volg? (Deuteronomium 6:4-9). Sal ons as kinders Jesus vertrou met ons jeugdige krag? Sal ons as leiers Jesus voorleef, deur voorbeelde van diensbaarheid te wees en nie ons eie eer nie, maar die van ons Vader in die hemel te soek? 

Wie sal saamkom? Kom saam met my, sê Jesus en Ek sal julle vissers van mense maak. Het jy Sy stem gehoor wat roep? Neem jou kruis op en volg Hom in 2018, kruisig jou wil en wees oop vir God se stem deur Sy Woord, jou omstandighede en medegelowiges, want deur die Visserman, die Groot Leermeester Jesus Christus te volg. Kom jy saam?

Shalom

Pieter Bezuidenhout