Sit jou hand op jou mond

Sit jou hand op jou mond

Ek ry in die kar en hoor die liedjie van Liza Bronner op die radio. My eerste reaksie is: Hoe kan ’n mens so ’n song skryf? Gewoonlik skryf die mense oor liefde en lekker dinge, maar die een gaan glad nie oor lekker dinge nie.

Soos die liedjie aangaan, wag ek vir die draaipunt. Ja, in afwagting wag ek dat die towerstaffie van die liefde moet swaai en dat die meisie weer in die ou se arms kan val, maar ek wag verniet, want die skokkende koortjie word oor en oor gesing:

Jy dink jy is reg
Maar ek weet jy is verkeerd
Dit is die krag in jou tong
Wat my siel in stukke breek
En die woorde uit jou mond
Gaan lê in my hart
Diep gegrond

Jou tong is ’n swaard
Wat in my hart inboor
Hoekom laat ek jou toe
Om my hart te moor
Ek is klaar geluister
Dit is my beurt om te praat
En hier is my raad

Sit jou hand op jou mond
Ek sal nie langer vir jou luister nie
Sit jou hand op jou mond
Ek sal myself bewaak
Met die leuens wat jy praat
En ek is klaar met jou
Sit jou hand

Jou blaf is groot
maar jou byt is klein
Ek is nie bang nie
Ek sal die wêreld wys
Wat die waarheid is oor my
Ek het opgestaan
Ek sal terugbaklei

Ek het ook ’n stem
En ek sal skree
Hoe jou opinie verander
Sal my bes probeer
Tot die dag wat jy besef
Ek is meer as wat jy sê van my

Sit jou hand op jou mond
Ek sal nie langer vir jou luister nie
Sit jou hand op jou mond
Ek sal myself bewaak
Met die leuens wat jy praat
En ek is klaar met jou
Sit jou hand

en ek sal opstaan
aangaan aanhou voortgaan
tree vir tree
ek sal heel word sterk word,
nooit nee nooit maar nooit opgee

In ’n artikel in Huisgenoot van Julie 2014 sê Liza in ’n onderhoud die volgende oor die liedjie: “Ek het die liedjie geskryf om mense te motiveer om vir die boelies in hulle lewe te sê: Sit jou hand op jou mond!”

Hoe ver het ons en ons mensdom nie verwyderd geraak van wat God wil hê ons moet wees nie? Hoe vinnig raak ons kwaad en met die eerste woord wat uitglip, glip die liefde saam.

In skaamte laat sak ek my kop as ek hier lees: 2Moenie voor op die wa wees nie en behandel ander mense so dat dit vir hulle lekker is om by julle te wees. As iemand jou kwaad maak of irriteer, beheer jouself deur steeds mooi teenoor hom op te tree. Laat liefde julle lojaal teenoor mekaar hou, ook wanneer julle voel julle het nou vir eers genoeg van mekaar gehad.

Ai…

Luister na liedjie hier: Sit jou hand op jou mond en klik op die play knoppie

Teks

Efesiërs 4:1-10 

Om oor na te dink

Sit jy soms jou hand op jou mond?

Loop die liefde soms daaruit?

Hoe moet jy anders maak?

Gebed

Vader, ek besef weereens my onvermoë om die lewe reg te loop. Ek bely dit. Ek kan dit nie op my eie maak nie. Amen

I