In die gestoei groei geloof

In die gestoei groei geloof

Kry jy soms ’n bietjie swaar? Worstel jy soms met dinge? Vlot alles nie altyd daar by die werk of besigheid nie? Hak jy en jou eggenoot soms oor die eenvoudigste ding? Voel jy dat jy nou vir eers genoeg geslaan is deur die lewe en net vir ’n slaggie wil asem skep? Is jy soms, of dalk nou, net mooi keelvol vir aanslag op aanslag?

Indien een, sommige of dalk almal van hulle waar is, het ek vir jou nuus: Welkom in die kring van die Christene! As jy jou verbind het om ’n lewe voluit saam met God te lewe, kan jy maar verseker weet dat jy nie altyd op die teerpad gaan ry nie. Selfs Paulus het meer gereeld op die grondpad geploeter as op die teerpad!

Paulus het uitmergelende werk vir God gedoen. Deur die werking van die Heilige Gees was hy tot op hede seker die persoon wat die evangelie die meeste deur die wêreld versprei en laat groei het. Hy kon darem sekerlik ’n sagter landing verwag het. Tog nie. 2… Ongelowige mense het ons daar verskriklik sleggesê en mishandel, maar dit het ons glad nie ondergekry nie. God het ons geloof sterk gemaak. Daarom was ons nie bang om na julle toe te gaan nie. Tog was dit nie so maklik om die goeie nuus in julle stad te preek nie. Die mense het ons baie swaar laat leef.

Nee, geen witbroodjies hier nie! Daarom, as jy die afgelope tyd, soos ek, die grondpad moes aandurf, moenie bekommerd wees nie. Jy bevind jou tussen ’n klomp goeie reisigers. Miskien moet dit ook gesê word dat as jy nog nie veel in jou lewe op die grondpad was nie, jy dalk effe bekommerd kan raak. Dalk is jy nie eintlik ’n bekommernis vir satan nie. Jammer as ek nou op die verkeerde knoppie gedruk het!

Ek dink wat Paulus reggekry het, was om bo-oor die omstandighede waarin hy hom bevind het, te kyk. Hy het geglo in die boodskap wat hy moes verkondig. Hy het geglo dat God Hom geroep het. Hy het geglo dat God met ’n krom stok soos hy ’n reguit hou kon slaan. Hy het vasgehou aan God en dit het sy geloof sterk gemaak. Maak nie saak hoe sleg die omstandighede nie, al was alles teen hom, het hy voort gebeur.

En dis presies wat ons moet doen. Ons moenie in die omstandighede om ons vaskyk nie. Ons moet met alles in ons glo in die verlossingsboodskap van God. Ons moet glo dat God ons geroep het, net daar waar ons ons nou bevind. Ons moet glo dat God met ’n klomp krom stokke soos ons ’n reguit hou kan slaan. Ons moet vashou aan God en weet dat dit ons geloof sal sterk maak. Ja, dit maak nie saak hoe sleg die omstandighede waarin ons nou is nie, al is baie teen ons, kan en sal ons voort beur en aan die anderkant uitkom. Lewendig.

Ek sê altyd ons moet die moontlike doen en die onmoontlike vir God los. En dit is juis ook hier van toepassing. Wat kan ek in die omstandighede doen waarin ek nou vasgevang sit? Dalk lyk alles vir jou onmoontlik, maar kyk bietjie om jou rond. Dalk is al die deure met slotte en grendels vas, maar is daar nie dalk erens ’n venster wat oopstaan nie?

Dalk moet jy raad gaan vra. Dalk lê die antwoord in jou vriend of kollega se kop. Bid vir God vir wysheid. Bid dat Hy jou die pad sal wys. Vra Hom om jou geloof sterk te maak. Eendag sal jy terugkyk en sien hoe God jou ook deur hierdie tyd gedra het. En jy sal al die eer aan Hom gee.

Teks

1 Tessalonisense 2:1-4

Om oor na te dink

Hoe lyk jou omstandighede?

Hoe sterk is jou geloof?

Vertrou jy vir God om jou te lei?

Gebed

Vader, ek het U leiding so nodig. Help my! Stap voor en wys my die pad. Maak my ore en oë oop. Wys my waar ek moet gaan. Amen.