Die petrol vir jou dade

Die petrol vir jou dade

Wat is die petrol vir jou dade? Hoekom doen jy dinge vir ander? Dink ’n bietjie mooi hieroor na.

Daar waar niemand jou sien nie, sal jy die papiertjie wat op die grond lê, optel? Daar waar niemand kan sien nie, sal jy die ou verwaarloosde mensie optel en Jesus se liefde uitleef? Daar waar jy aan die hol is en eintlik nie tyd het nie, sal jy alles los en ’n armsalige optel en oor die besige straat van die lewe help?

Wanneer ons met verkeerde motiewe ander mense help, sal ons nie aan ander goeddoen as ons alleen is nie. Dis seker voor die hand liggend. Onsself en ons eie eer moenie die petrol vir ons goeie dade wees nie. Soos Paulus en sy vriende sê: 6Ook soek ons nie na die erkenning van mense nie, nie julle s’n nie en ook nie ander mense s’n nie.

As ’n mens dinge doen om erkenning van mense te kry, gaan ons gou agterkom dat dit nie so werk nie. Mense gaan ons gou teleurstel. Hulle gaan vergeet om vir ons dankie te sê. Hulle gaan vergeet om erkenning te gee en gaan verwag dat ons keer op keer moet help. ’n Voorreg raak spoedig ’n reg en gou-gou kom daar misverstande omdat ons bedoelings aan die begin dalk nie suiwer was nie.

Die gevolg is dat ons petrol opraak om goed te doen en die wêreld bly onveranderd met die nood wat net al hoe groter word. Mense moet nooit ons vertrekpunt of motivering wees om iets goed te doen nie.

Dankbaarheid moet die rede wees. Die feit dat Jesus bereid was om in ons plek die straf vir ons sonde te dra, moet my propvol dankbaarheid maak. Soveel dankbaarheid dat ek nie anders kan as om oor te loop daarvan nie. Dis die soort dankbaarheid wat die petrol vir my goeie dade moet wees.

Dan sal ek nooit teleurgestel word as mense nie dankie sê vir al my moeite nie. Wanneer mense dan die voorreg in ’n reg omdraai, sal ek nie wonder of ek weer en weer ’n verskil in hulle lewens moet maak nie. Ek sal nie spoed verloor as ek goeddoen en mense waardeer dit nie, want ek doen dit nie vir hulle erkenning nie. Ek doen dit vir Jesus. Ek doen dit uit dankbaarheid vir wat Hy vir my gedoen het, want hulle verdien die genade net soos min soos ek.

6Ook soek ons nie na die erkenning van mense nie, nie julle s’n nie en ook nie ander mense s’n nie.

Mag dit waar wees van ons almal. Mag ons eendag in die hemel aankom en mag God dan sê: “Welgedaan. Goed gedoen my kind. Jy het uit dankbaarheid ’n groot verskil gemaak.”

Ons erkenning kom in die lewe hierna.

Leef dan so. Doen jou ding nie om erkenning van mense te kry nie, maar van God.

Teks

1 Tessalonisense 2:5-12

Om oor na te dink

Doen jy goeie dade?

Wat motiveer jou?

Wie se erkenning is vir jou belangrik?

Gebed

Here, as ons ons harte so bekyk, besef ons dat ons dikwels dinge doen om eer van mense te ontvang. Ons erken dat dit nie reg is nie. Vergewe ons hiervoor. Help ons, Here, om uit dankbaarheid aangevuur te word en om goed te doen aan ander, orals waar ons kom, omdat U vir ons so goed is. Amen.